ویگنر کے اوپَیرا سے ماخوذ

موزارت کے سوناتا، ویگنر کے اوپیرا اور روی شنکر کی دھنوں پر مبنی ستیہ پال آنند کی
نظموں کا یہ سلسلہ سات نظموں پر مبنی ہے اور اردو میں اپنی نوعیت کا واحد کام ہے۔ درج ذیل نظم ویگنر کے اوپَیرا “فلائنگ ڈچ مین” سے ماخوذ ہے اور تین الگ الگ ٹکڑوں پر صوتی محاکات سے استوار ایک گیت ہے۔

سرگوشی سی ہوا کے کانوں میں ۔۔۔۔۔۔
سر سر سر سر ۔۔۔۔ سر سر
اُٹھ جاؤ، پہلو بدلو، پھر چٹک چٹک کر لہراؤ
اور پھول کھلاؤ
بھور سمے ہے
سونے کا اب سمے نہیں ہے
گُن گُن گاؤ
گیلی گھاس پہ چلتی جاؤ
چپڑ چپڑ پٹ، چھب چھب، چھب چھب
پاؤں بھیگ گئے نا تمرے؟
دیکھا، چھوری؟ اب اپنے پاؤں مت پونچھو
اک ننھی سی دوڑ لگاؤ
اک کلکاری بھرو تو دیکھیں۔۔۔
کتنا اونچا اُڑ سکتی ہو
دور سامنے
!سورج کو اُگتے دیکھو تو
اپنے دونوں ہاتھ جوڑ کر
سر کو جھکانا
پھر دھیرے سے کہنا ۔۔۔ میں اب چلت پھرت ہوں
اب یہ دھرتی آپ کی ہی دولت ہے، سوامی ۔۔۔۔

(۲)

بہت دیر سوئے ہو، سورج، اٹھو اب
تمہارے ہی چمکیلے بالوں سے
کرنوں کی بہتی ہوئی تیز لہراتی ندیاں
اڑا دھم، بھبھک بھوں، کڑک، گڑگڑاہٹ
میں چنگھاڑتی نیچے اتریں گی
کچھ دیر میں جب زمیں پر ۔۔۔۔
تو سب جاگ اُٹھیں گے، ، مانس، مویشی
پرندے، چرندے، مکوڑے
کھٹا کھٹ، دھما چوکڑی، غلغلہ زندگی کا
چکا چاک، بم چخ، گجر، ڈھول، نوبت
یہی کچھ تو ہے زندگی میں تمہاری بدولت
دما دم صدائیں جو “کن” کی شروعات سے
آج تک سارے آفاق میں گونجتی ہیں۔

(۳)

کہاں گئی ہے تڑک بھڑک
دن کی جلتی بھُنتی ہوئی دُپہری کی؟
سہ پہر کی دھمک دھمک دھم گذر گئی ہے
تِکال کی بیلا
سر پہ چھایا کا چھتر لے کر
تنے ہوئے تمبوؤں سی پھیلی ہوئی کھڑی ہے
یہ گٹ، نفیری، یہ بھنبھاہٹ
یہ لقلقہ، ہلکی اور دھیمی سی بانگ، ہچکی سی بلبلاہٹ
کھڑاک سی مُرکیاں، گھُمر گھوں،
یہ اونچی، نیچی طبلچیوں کی تھاپ
ساتھ اس کے
سخن طرازی رباۃ ِ فن کی
صداؤں کا کالا پن بدلتا ہوا اندھیرے میں ۔۔۔
گھُپ، گھٹا ٹوپ
گدلا، مدھم، کثیف، کہریلا
کیسا ہنگام ِ شب ہے جس میں
بجھا بجھا زرد رنگ بھی ہے
پریدہ، بھوسل سی ، نیم گہنائی روشنی بھی تنی ہوئی ہے۔
زمیں پہ اور آسماں پہ کس نے
غلیظ، گدلی سی چھولداری کو تان کر
پردہ دار بیگم بنا دیا ہے؟
دھرا دھرا دھر ۔۔۔ دھرا دھرا، دھر
کوئی نہیں ہے ۔۔۔ کوئی نہیں ہے
کوئی نہیں ہے ۔۔۔۔ فقط اندھیرا،فقط اندھیرا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یہ تین “سُر لہریں” مندرجہ ذیل بحور میں نظم کی گئیں۔
ایک ۔ ہندوی چھند جسے امیر خسرو نے فعلن فعلن کی تکرار میں ترتیب دیا۔
دو بحر متقارب ۔۔ یعنی فعلون فعولن کی تکرار، جس کی روانی میں دوڑنے کی سی تیزی ہے۔ اور تین ۔۔۔۔ بحر متقارب مقبوض اثلم۔ یعنی فعول فعلن کی تکرار۔