لاشعور سے شعور تک

ہر طرف خاموشی تھی ۔چاروں طرف موم بتیوں کا بسیرا تھا ۔میزیں انواع و اقسام کے کھانوں سے سجی تھیں ۔کنیرڈ کالج کے بالکل سامنے نیرنگ آرٹ گیلری کے کیفےمیں خوبصورت دماغوں اور پریوں نے دلکش جھمگٹا لگایا ہوا تھا۔آرٹ گیلری دلکش تصاویر سے مزین تھی۔آرٹ گیلری کے چاروں کونوں میں دلکش رنگ برنگے برقی قمقمے مسکرا رہے تھے ۔یہ برقی قمقمےفنکاروں کے فن کو مزید دلکش اور خوبصورت بنا رہے تھے۔حسن اور خوبصورتی تھی کہ ہر طرح سے مجھے اور اسے ورغلا رہی تھی ۔حسین لڑکے اور لڑکیوں کا مدھم روشنی میں روح پرور رومانس اور ان کے بیچ و بیچ ادیبوں کا میلہ ۔۔۔۔واہ کیا رونق تھی ۔رومانوی جوڑوں کے بیچ دھری میزیں مغربی مشروبات سے آراستہ تھیں جبکہ ادیبوں کی میزوں پر چائےکافی چل رہی تھی۔ہلکی آواز میں موسیقی دلوں کو چھو رہی تھی ۔ایسے محسوس ہورہا تھا جیسے ہم واقعی کسی خیالی تخلیقی جنت کے خوبصورت حصے میں آچکے ہیں،کافرادائیں ،باغی خیالات اورقاتل چہرے ۔۔۔۔ پراسرار خاموشی میں دھیمے لہجے میں بولتے نوجوان لڑکے لڑکیاں اور ادیب ۔۔۔۔واہ کیا منظر تھا نیرنگ آرٹ گیلری کا ۔۔۔۔۔۔۔
مجھے اور اسے کسی ایسی ہی جگہ کی ضرورت تھی ۔پتہ نہیں کیوں اور کیسے وہ مجھے اپنے ساتھ اس آرٹ گیلری میں لے گئی تھی۔تازگی اور دلکشی چیختی چلاتی نظر آرہی تھی ۔ہم دونوں موم بتیوں سے مزین ایک میز کے آمنے سامنے پڑی دو کرسیوں پر براجمان ہوگئے ۔وہ میرے سامنے بیٹھی خاموشی سے مسکراتی نظر آرہی تھی ۔موم بتیوں سے نکلتی روشنیوں میں اس کا چہرہ چمکتا نظر آرہا تھا اور میں اس کے قرب کے خمار میں ڈوبا ہوا تھا۔وہ جب بولتی تو میں اس کے سحر میں ڈوب جاتا وہ جب مسکراتی اور اس کے ہونٹوں کی سرخی اور دانتوں کی سفیدی میری آنکھوں سے ٹکڑاتی تو میری روح وجدان کی بلندی کو چھونے لگتی ۔اس کا مسکرا کر کھلکھلا اٹھنا مجھے بیقرار کر رہا تھالیکن یہ ایسی بیقراری تھی جو مجھے روحانی سکون دیتی نظر آرہی تھی ۔

رومان زدہ اس ماحول میں محبت، امن، پیار اور عشق کا بسیرا تھا ۔میں ملامتی صوفی کے روپ میں شیطانی سرور کا مزہ لے رہا تھا ۔ہم دونوں کے سامنے لگی میزپر چار ادیب گفتگو میں مصروف تھے ۔میں اور وہ اس رومانوی ماحول کو فراموش کرکے ان دانشوروں کی دنیا کا حصہ بن گئے ۔ایسا کب،کیوں اور کس طرح ہوا ہم دونوں کو معلوم نہ ہوسکا؟ کہیں روشنی اور کہیں سوچتا اندھیرا ۔۔۔۔۔ہم دونوں خاموشی سے سوچنے والے انسانوں کی سوچ کے عشق میں مکمل طور پر مبتلا تھے۔ ان چار ادیبوں میں ایک خاتون ،ایک نوجوان اور دو بوڑھے تھے ۔نوجوان لمبے بالوں، پرانی طرز کی عینک اور سفید شلوار قمیض کے ساتھ منٹو دکھائی دینے پر تلا تھا ۔نوجوان کے رنگ ڈھنگ ہی نرالے تھے ۔وہ ان سب میں بلاوجہ نمایاں تھا۔
بوڑھا ادیب کہہ رہا تھا ،”حضور والا اس وطن میں پچاس فیصد روحیں تعلیم سے محروم ہیں جبکہ جو نام نہاد تعلیم یافتہ بھی ہیں وہ جہلاسے بڑھ کر ہیں۔انتہا پسندی اوردہشت گردی ان نام نہاد پڑھے لکھے لوگوں کی وجہ سے پھل پھول رہی ہے ۔تعلیم یافتہ جاہل ان پڑھ جاہلوں سے زیادہ خطرناک ہو چکے ہیں ۔ان جاہلوں کے قلم سے نکلے الفاظ انسانوں کو بندوق اور نفرت کی طرف مائل کررہے ہیں ۔یہ ڈیجیٹل زمانہ بھی ہمارے معاشرتی ماحول اور اس کی فطرت کو تبدیل کرنے میں ناکام ہو چکا ہے۔ پاکستان اور دنیا میں کوئی ایسا دہشت گرد نہیں جو چٹاان پڑھ ہو ۔ہر دہشت گرد پر تعلیم کا اثر ہوتا ہے۔ان میں سے ہر ایک کسی نہ کسی جاہل کے زہر آلود نظریات ہی سے متاثر ہے۔اس ملک کے تعیم یافتہ دماغ ،ریاستی ادارے اور خود ریاست اپنے مفادات کے لیے مرضی کے انسان پیدا کررہے ہیں ۔یہی وجہ ہے کہ پاکستان میں شعور بھی درندگی کی کیفیت میں ہے ۔علمی بددیانتی کی وجہ سے دہشت گردوں اور انتہا پسند عناصر کی تعداد میں اضافہ ہورہا ہے”۔بوڑھا ادیب غصے میں تھا ۔اونچی آواز میں اس نے کہا ،”قرآن سے لے کر اقبال اور قائداعظم تک کے خیالات ونظریات کو ہر ایرا غیرا اپنی مرضی کے مطابق ڈھال رہا ہے ۔افراد، ادارے سب کے سب علمی بددیانتی میں ملوث ہیں "۔

بوڑھے ادیب کے خاموش ہونے کی دیر تھی کہ سامنے والے دوسرے بوڑھے نے گفتگو کو آگے بڑھاتے ہوئے کہا ۔” اس ملک میں اب روشن خیال اور ترقی پسند ادب کہاں چھپتا اور بکتا ہے؟؟ لیکن انتہا پسندانہ لٹریچر لاکھوں کی تعداد میں شائع ہو رہا ہے ۔اردو زبان اب انتہاپسندوں کی زبان بن چکی ہے ۔انتہا پسندانہ اور فرقہ وارانہ مذہبی لٹریچر اردو زبان کی بدصورتی کا سبب ہے ۔صرف ایک چھوٹا سا منافق روشن خیال طبقہ ہے جو انگریزی میں سوچتا ،لکھتا اور پڑھتا ہے ۔
بہت دیر سے خاموش بیٹھی خاتون بھی بحث میں الجھ پڑی۔تین مردوں میں گھری خاتون ڈرتے ڈرتے بولی۔” ہمارے ادیب اور دانش ورصرف یہ بتارہے ہیں کہ کس طرح یہودوہنود پاکستان، اسلام اور مسلم امہ کے خلاف سازش کررہے ہیں۔ کس طرح امت کو کم زور کیا جارہا ہے۔اب اردو ادب میں ان نام نہاد ادیبوںکالم نویسوں کی تعداد بڑھتی چلی جارہی ہے جو یہ لکھ رہے کہ پاکستان اور اسلام کو دنیا سے کتنا بڑا خطرہ ہے ۔پوری عمارت ہی اسی بنیاد پر تعمیر کی جارہی ہے۔انتظار حسین، فیض احمد فیض، مجید امجد ، ن- م- راشد، سبط حسن اور علی عباس جلالپوری توقصہ پارینہ بن چکے ۔نسیم حجازی سے متاثر نام نہاد تعلیم یافتہ ادیب ایسا ادب تخلیق کررہے ہیں جو عوام کی نرگسیت میں اضافہ کررہا ہے۔ ایسا ادب صرف اور صرف جہالت پھیلارہا ہے۔ادبی محفلوں کا رواج تقریبا ًناپید ہوتا جارہا ہے ۔ساحر لدھیانوی اور مخدوم کو اب کون کمبخت جانتا ہے ۔ترقی پسند ادب کی روایت دم توڑ گئی ہے ۔انیس اور دبیر کے مرثیوں سے ہماری نوجوان نسل کہاں واقف ہے ۔تجریدیت، اشتراکیت، لبرل ازم کی بجائےاب ادیب کا قبلہ ماضی ہے۔ایک زمانہ تھا جب اردو تحاریران موضوعات سے اٹی پڑی تھیں ۔انیس سو اناسی میں جب روس نے افغانستان پر قبضہ کیا اور اس کے بعد انکل سام کی افغانستان میں آمد ہوئی ۔پھر تو پاکستان میں تمام خیالات و نظریات اور بیانیے ہی امریکہ کی مرضی سے تخلیق کیے گئے۔اسی کی دہائی میں ہی تو ہمارے نصاب میں خ سے خنجر آیا، ب سے بندوق اور الف سے اللہ آیا۔ پاکستان کا نصاب بھی پھر امریکہ کی مرضی سے بنا۔امریکہ نے ایسے منافق لوگ بنائے جو کمیونزم کی ایسی تیسی پھیر سکیں ۔روس کو افغانستان سے بھگا سکیں۔ستر کی دہائی کے کتاب میلوں میں دس فیصد مذہبی لٹریچر ہوتا تھا اور نوے فیصد کتابیں علمی یا سیکولر نوعیت کی ہوتی تھیں اور اب نوے فیصد کتب مذہبی مواد پر مشتمل ہوتی ہیں۔اس دور کے میلوں میں فیض، سعادت حسن منٹو، عصمت چغتائی اور ساحر لدھیانوی کے خیالات خوب بکتے تھے ۔لیکن اب تو سب خلط ملط ہوگیا”۔

گفتگو کا سلسلہ جاری تھا ۔ وہ اور میں دانش وروں کے سحر میں گرفتار تھے ۔ ہم دونوں رومانس اور محبت کی چاشنی لینے آئے تھے لیکن یہاں تو اب معاملہ ہی مختلف تھا۔ رومانس کو بھول کر ہم اب سیاست، ادب اور تاریخ کے سحر میں قید ہو چکے تھے ۔
نوجوان ادیب جو بہت دیر سے بولنے کے لیے بیقرار تھا ۔اب اس کی باری تھی ۔”صاحب اردو زبان میں بہت جان ہے ۔ ترقی پسند ادب کا ایک نمائندہ حصہ اسی زبان میں ہے ۔مسئلہ یہ ہوا ہے کہ ترقی پسند ادیبوں اور روشن خیال دانشوروں نے اردو زبان میں لکھنا ہی چھوڑ دیا ہے۔ریاست اور ریاستی اداروں نے جہادی اور ان اردو اخبارات کی سرپرستی کی ہے جو مذہبی شدت پسندی پھیلا رہے ہیں ۔آج کے اردو اخبارت میں بھی نوے فیصد نسیم حجازی کے خیالات ملتے ہیں ۔۔۔۔اردو اخبارات میں آج بھی جناح کی گیارہ اگست کی تقریر کے وجود کو تسلیم کرنے سے انکار کیا جاتا ہے یا پھر اس تقریر کو سازش لکھا جاتا ہے ۔نیوز چینلز پر نفرت سےبھرپور تعصبانہ ذہن کا قبضہ ہے ۔ہر سکرین پر ڈاکٹر شاہد مسعود ، اوریا مقبول جان اور زید احمد جیسے نقلی دانشورنظر آتے ہیں جن کا مقصد ہمیں ہمارے خول میں بند رکھنا ہے۔جوخیالات اور نظریات پھیلادیئے گئے ہیں ان کی وجہ سے تشدد،دہشت گردی اور انتہا پسند میں اضافہ ہورہا ہے ۔منٹو اور فیض کی زبان اب حافظ سعید، مولانا طارق جمیل اور اوریا مقبول جان کی زبان بن چکی ہے۔بڑی چالاکی سے اس زبان کو یرغمال بنایا گیا ہے ۔۔۔روشن خیال تو اب اس قدر منافق بن چکے ہیں کہ اردو کتاب پڑھنے کو اپنی توہین سمجھتے ہیں ۔صاحب یہ روشن خیال تو اب یہ تک کہتے ہیں کہ ان کے بچوں کی اردو بڑی کمزور ہے ۔پاکستان میں نوجوان نسل کو پنجابی، پشتو، سندھی، بلوچی اور سرائیکی زبانوں میں ادب دینے کی ضروت ہے ۔ایک زمانہ تھا جب بائیں بازو کے دانشور ،ادیب اور کالم نویس ہماری ذہن سازی کررہے تھے۔دائیں بازو کے لکھاری خال خال ہی تھے ۔اب صورتحال مختلف ہے ۔اب بائیں بازو کے اینٹی اسٹیبلشمنٹ سوچ رکھنے والے اور الگ سوچنے والے ادیب ،کالم نویس اوردانش ور نایاب ہو چکے ہیں۔”
گفتگو کا سلسلہ جاری تھا۔وہ گفتگو سنتے سنتے تھک چکی تھی۔رات کے دس بج چکے تھے ۔ہم دونوں نیرنگ آرٹ گیلری کی خوبصورت دنیا سے باہر نکلے ۔وہ رکشے پر بیٹھ کر گھر کو چلی گئی اور میں پیدل سڑکوں پر آوارہ گردی کرنے چل نکلا۔