قائد اعظم یونیورسٹی ؛ فیسوں میں اضافہ کے خلاف طلبہ کا مظاہرہ

قائد اعظم یونویرسٹی اسلام آباد کے ایم فل اور پی ایچ ڈی پروگرامز کے طلبہ نے ہاسٹل واجبات میں اضافہ کے خلاف وائس چانسلر ڈاکٹر اعتزاز احمد کی رہائشگاہ کے باہر احتجاج کرتے ہوئے فیسوں میں اضافہ واپس لینے کا مطالبہ کیا۔ یونیورسٹی سنڈیکیٹ کی جانب سے منظور کی گئی نئی پالیسی کے تحت ایم فل کے چار سمسٹرز اور پی ایچ ڈی کے آٹھ سمسٹرز کے بعد طلبہ سے ہاسٹل خالی کرا لئے جائیں ۔ نئی پالیسی کے نفاذ کے بعد مقررہ سمسٹرز میں اپنا کام مکمل نہ کرنے والے مزید قیام کے خواہش مند طلبہ سے مزید فیس وصول کی جائے گی۔
احتجاج کرنے والے طلبہ نے ذرائع ابلاغ سے بات کرتے ہوئے بتایا کہ یونیورسٹی انتظامیہ مقررہ سمسٹرز کے بعد ہاسٹل میں چھ ماہ کے قیام کے لئے 12000 روپے فیس وصول کررہی ہے۔ بعض طلبہ نے نئی پالیسی قبول نہ کرنے والے طلبہ کو جرمانہ کئے جانے کا بھی انکشاف کیا۔ ایم فل کے ایک طالب علم نے نام نہ بتانے کی شرط پر بتایا کہ ایسے طلبہ جو نئی پالیسی سے اختلاف رکھتے ہیں، کو تیس سے چالیس ہزار روپے تک جرمانہ کیا گیا ہے۔ یونیورسٹی کے اس فیصلہ سے 350 کے قریب طلبہ متاثر ہوئے ہیں۔
وائس چانسلر قائد اعظم یونیورسٹی ڈاکٹر اعتزاز احمد نے طلبہ مظاہرین سے یہ معاملہ یونیورسٹی سنڈیکیٹ کے سامنے پیش کرنے کا وعدہ کیا، واجبات میں اضافہ یونیورسٹی سنڈیکیٹ نے کیا ہے ، اور اسے ختم کرنے کا معاملہ بھی سنڈیکیٹ ہی طے کرے گا۔ وائس چانسلر کے مطابق نئی پالیسی کا مقصد طلبہ کو وقت پر اپنا تحقیقی کام مکمل کرنے کی ترغیب دلانا تھا تاکہ نئے آنے والے طلبہ کے لئے ہاسٹل میں جگہ بنائی جا سکے۔