سوال

خواہشوں کے جگنو کیوں کھو سے گئے ہیں
اظہارِ تمنا کی سعی ٹوٹ چکی
بے ربط خیالوں میں چھپی
ہر سوچ کی خوشبو اب روٹھ چکی
مجبورآنکھوں سے اشکوں کی لڑی
سوال بن کرٹپک رہی ہے
مکتب کی رُت میں زیست کی الجھن
آنکھوں میں ریزہ ریزہ خوابوں کی چبھن
آتشِ افلاس کےشعلوں پے
سلگتی ہوی بے رنگ و بے نام سی دنیا
میری دنیا ….
جاڑے میں ٹھٹھرتا ہوا کنگال شجر
تشبیہہ عین ہے اس دنیا کی
میری دنیا کی ….
مایوسِ رحمت نہیں ہوں
منکرِ خدا نہیں ہوں
اس نے لکھا میرے حصے کا رزق بہت تھا
یہ بات مگر اب قسمت سے کہیں آگے ہے
کہ میری آنکھوں کو میسر نہیں
دیدارِ لقمہ نعمت ۔ ۔ ۔ ۔ ۔
اہلِ حکم کے ایوانوں سے نکلتے ہوئے
احکامات کے انبار بے معنی
صاحبِ منبر کی زباں سے ادا ہوتے
ایماں افروز قصے بے مقصد
آتشِ افلاس بھڑکتی جاتی ہے
زیست افلاس کا مداوا چاہتی ہے
چارسو گونجتا پھرتا ہے سوال
پلٹ کر سماعتوں سے ٹکراتی
سوال کی گونج ….
جواب مگر عمیق خاموشی
ہر صاحبِ زباں چپ آدمی خاموش
ہرشجر ہر بشر چپ، تِہامی خاموش
جواب عمیق خاموشی ….