اگر یہ زندگی تنہا نہیں ہوتی

اگر یہ زندگی تنہا نہیں ہوتی
تو اس کو خوبصورت پھول میں تبدیل کرنے کے لیے
کترا نہ جا سکتا
کبھی اس سے کوئی کاغذ کی کشتی جوڑ کر
گہرے سمندر کی طرف بھیجی نہ جا سکتی
سفر کے درمیاں آئی اک انجانی سرائے میں
ذرا سا دام کے بدلے
اسے ہارا نہ جا سکتا

اگر یہ زندگی تنہا نہیں ہوتی
تو اس کو مختلف ٹکڑوں کے اندر بانٹ کر
ہم اپنی مرضی کے نہ ان میں رنگ بھر سکتے
بڑی مقدار میں اس کو
نہ ہم ای میل کر سکتے
اگر یہ زندگی تنہا نہیں ہوتی
تو اس کے خوبصورت رنگ
آوارہ سی اک بارش میں دھو ڈالے نہ جا سکتے
اگر یہ زندگی تنہا نہیں ہوتی
تو اس کے فالتو ٹکڑے
منڈیروں پر پرندوں کے لیے پھینکے نہ جا سکتے