اگرگولی کی رفتار سے تیز بھاگ سکتا

اگر شام برستی بارش میں
دفتر سے جلدی نکلنے کی بجائے
فائلوں کی ورق گردانی میں مشغول رہتا
-یا-
کھڑکی سے بھیگے کپڑوں میں ٹہلتی لڑکی کے
خواب چُرانے کی کوشش کرتا
جس کی محبت کی نسل کشی کا آغاز
ہفتے بھر سے زیر بحث ہے

اگر غیر اعلانیہ لوڈ شیڈنگ سے بتیاں بُجھ جاتیں
عذر تراش لیتا
-یا-
گھڑیوں میں گھنٹہ آگے کرنے کی پالیسی
کالعدم قرار نہ پاتی

ایسا بھی ممکن تھا
ریگل کی طرف پیدل چلنے کی بجائے
گرین بس میں سوار ہوجاتا
اور ٹریفک کی بے ترتیب قطاروں میں پھنس کر
صبر کا الٹا پہاڑہ یاد کرتا
-یا-
مزارِ قائد کے سامنے پارک میں
خیراتی ادارے کے سربراہ کی تقریر سنتا
جو روٹی کے فوائد بیان کررہا تھا
-یا-
میں گولی کی رفتار سے تیز بھاگ سکتا
-یا-
اسلامی رسالے
ویلنٹائن کو متفقہ حرام قرار دے دیتے
میں کچھ دن اور زندہ رہ سکتا تھا
اگر۔۔۔۔
میرے ہاتھ میں پھول نہ ہوتے